身體掃描練習

做身體掃描練習嘅時候，我哋將注意力放响內在嘅感覺。細心留意自己此時此刻身心嘅狀況。經常練習，可以幫助我哋增加對身體狀況嘅覺察能力。依家，搵一個舒適而唔受干擾嘅地方，熄咗手提電話。雙手可以好輕鬆咁放起身體兩旁，雙腳平放踏地。如果你喜歡嘅話，可以以合埋雙眼，令自己集中一啲。

將注意力放响你嘅身體，留意你嘅呼吸。慢慢咁做幾吓深呼吸，吸氣...呼氣...吸氣...呼氣...

當你慢慢深深咁吸一口氣，會將更多嘅氧氣帶入你嘅身體；當你慢慢呼氣嘅時候，就讓自己感覺放鬆...放...鬆...

依家，將注意力放响你嘅腳趾，感覺一下佢哋係溫暖、涼快、濕潤，抑或係焗促？俾腳趾放...鬆...

然後，將注意力移去腳底，感受一下腳底同地板接觸嘅感覺。感覺腳底所負嘅重量、壓力、肌肉細微嘅顫動、皮膚溫暖或者係涼快嘅感覺。無論你留意到有啲乜嘢特別嘅感覺，又或者無乜特別嘅感覺，只需要去察覺、接納呢一刻嘅感覺，俾呢啲感覺自然咁出現，自然咁存在，又或者自然咁消失。

然後，將注意力放响你嘅小腿，感覺一下小腿肌肉嘅壓力、細微嘅顫動、小腿後面肌肉疲勞或者係輕鬆嘅感覺。將小腿肌肉放...鬆...

將注意力慢慢往上移到你嘅膝頭、大腿、臀部...

再將注意力繼續慢慢往上移到你嘅背脊。留意一下背部嘅肌肉，肌肉有無拉緊、疲勞、冤痛嘅感覺？將佢哋放...鬆...

將注意力移到你嘅胃部。如果你覺得胃部有緊張、拉扯，就將佢哋放...鬆... 將注意力移到你嘅胸膛，繼續慢慢咁吸氣...呼氣...吸氣... 呼氣...

將注意力慢慢移到你嘅膊頭、手臂、雙手。感覺雙手嘅壓力、溫度、震動...試下將對手嘅肌肉軟化、放鬆。

將注意力由雙手移番去你嘅手臂、膊頭，放鬆一下你嘅膊頭。

然後，將注意力移去你條頸、喉嚨。留意呼吸嘅時候，你喉嚨嘅感覺。放鬆你下巴嘅肌肉，放鬆你塊面兩邊嘅肌肉，放鬆額頭嘅肌肉。

將注意力放响你嘅頭上，感覺頭上皮膚嘅拉緊、溫暖、又或者係涼快嘅感覺。放鬆你頭部嘅肌肉。

集中精神去留意你整個身體，再慢慢吸氣...呼氣...吸氣...吸氣...呼氣...

當你準備好，就可以慢慢咁張開你嘅眼睛，完成身體掃描練習。