意象松弛练习

你喺一个舒适安静慨环境坐低，背靠椅背，双手好轻松咁放喺身体两旁，双脚平放踏地，慢慢阖上双眼，然后想象自己喺一个美丽慨海滩入面，集中感受身处其中慨各样轻松感觉。

喺风和日丽慨一日，你去到一个广阔、宁静、又美丽慨海滩。你望向天空，睇见蓝天白云，仲有几只海鸥自由自在咁飞翔。你向前望，见到蓝绿色慨海水，不断冲刷住沙滩上米黄色慨幼沙，你听到一阵又一阵慨海浪声，你慢慢咁深呼吸，闻到空气中有阵阵海水慨味道，你感到呼吸好舒畅，海风轻轻咁吹住你慨头发、脸庞、身体，你觉得好清爽。你除咗对鞋，赤脚踏上沙滩，两只脚板慢慢埋咗入啲好幼细慨沙入面，你轻轻郁吓啲脚趾，集中去感受双脚埋喺暖洋洋、软绵绵慨幼沙里面，嗰种好舒服慨感觉。

带住呢种舒服慨感觉，你由沙滩慢慢好轻松咁行去海边，你每踏一步，啲暖洋洋、软绵绵慨幼沙马上包住你只脚。

当你提起只脚，啲幼沙又响你慨脚板同脚趾之间流过，你一路行，啲幼沙就不断左右按摩住你对脚，你觉得两只脚越行越舒服。你慢慢去到海边，脚底下慨沙变得越来越湿润，沙滩表面变得好光滑，你稍为用力压上脚印，然后睇住啲浪涛，轻轻咁涌到你慨脚印。脚印上慨沙随住浪涛又轻轻咁卷返去大海，啲海浪轻轻咁涌上嚟，又退落去，再轻轻咁涌上嚟，又退落去，你见到你慨脚印慢慢变得模糊，直至几乎睇唔见，然后消失。你脑入面慨思绪烦扰都被涌上嚟慨海浪一并轻轻卷到大海，送到遥远慨地方，你而家带住平静心情，慢慢离开个海滩，我会由五倒数到一，当我数到一慨时候，你可以慢慢张开双眼，带住呢份新鲜平静慨感觉继续你慨生活。

五四三二一。