意象鬆弛練習

你喺一個舒適安靜嘅環境坐低，背靠椅背，雙手好輕鬆咁放喺身體兩旁，雙腳平放踏地，慢慢闔上雙眼，然後想像自己喺一個美麗嘅海灘入面，集中感受身處其中嘅各樣輕鬆感覺。

喺風和日麗嘅一日，你去到一個廣闊、寧靜、又美麗嘅海灘。你望向天空，睇見藍天白雲，仲有幾隻海鷗自由自在咁飛翔。你向前望，見到藍綠色嘅海水，不斷沖刷住沙灘上米黃色嘅幼沙，你聽到一陣又一陣嘅海浪聲，你慢慢咁深呼吸，聞到空氣中有陣陣海水嘅味道，你感到呼吸好舒暢，海風輕輕咁吹住你嘅頭髮、臉龐、身體，你覺得好清爽。你除咗對鞋，赤腳踏上沙灘，兩隻腳板慢慢埋咗入啲好幼細嘅沙入面，你輕輕郁吓啲腳趾，集中去感受雙腳埋喺暖洋洋、軟綿綿嘅幼沙裏面，嗰種好舒服嘅感覺。

帶住呢種舒服嘅感覺，你由沙灘慢慢好輕鬆咁行去海邊，你每踏一步，啲暖洋洋、軟綿綿嘅幼沙馬上包住你隻腳。

當你提起隻腳，啲幼沙又響你嘅腳板同腳趾之間流過，你一路行，啲幼沙就不斷左右按摩住你對腳，你覺得兩隻腳越行越舒服。你慢慢去到海邊，腳底下嘅沙變得越來越濕潤，沙灘表面變得好光滑，你稍為用力壓上腳印，然後睇住啲浪濤，輕輕咁湧到你嘅腳印。腳印上嘅沙隨住浪濤又輕輕咁捲返去大海，啲海浪輕輕咁湧上嚟，又退落去，再輕輕咁湧上嚟，又退落去，你見到你嘅腳印慢慢變得模糊，直至幾乎睇唔見，然後消失。你腦入面嘅思緒煩擾都被湧上嚟嘅海浪一併輕輕捲到大海，送到遙遠嘅地方，你而家帶住平靜心情，慢慢離開個海灘，我會由五倒數到一，當我數到一嘅時候，你可以慢慢張開雙眼，帶住呢份新鮮平靜嘅感覺繼續你嘅生活。

五四三二一。